SUN世代：亞姐告別娛圈尋真寶

九○年亞洲小姐孫譽文（原名孫名翠）離開娛樂圈後轉戰商界，○六年涉足珠寶業，售賣自己設計的鑽飾，大賺女人錢。畢業於演藝學院的她，有着藝術家脾氣，當初毅然告別多姿多采的娛樂圈，只因在台上表演已找不到滿足感，「喺珠寶我搵到滿足感，愈來愈多人欣賞我嘅設計，真係好開心！」

孫譽文（Karen）是九○年亞姐第五名，同屆冠軍為吳綺莉。她出身小康之家，有五兄弟姊妹，排行第四。自小已具藝術天分，中五畢業後，適逢演藝學院創校，中學修女鼓勵她報考。「我個人好creative，鍾意試新嘢，終於揀咗現代舞，香港從來冇人學過㗎！」與她同屆的還有戲劇系的黃秋生、張達明等。

畢業後她加入城市當代舞蹈團，更是第一個兼演舞台劇的舞蹈員。期間她拍過多個廣告，又演過藝術電影，但她說拍戲不是為出名，「只係想試吓唔同嘅藝術元素」。

在台上找不到滿足感

正因為想有新嘗試，她決定參選亞姐，原本打算完成比賽之後繼續跳舞，但經不起亞視苦苦游說，終於簽約做藝員。「我讀演藝嘛，當時邊有呢類咁專業嘅artist呢，原本亞視規定簽三年，但我只肯簽兩年，佢哋又OK喎。」想在娛樂圈出位，要搞緋聞、扯是非，她自覺並不適合，約滿後便急急離開，回到演藝學院繼續進修。

有感不同形式的藝術表演都試過，在台上已找不到滿足感，九九年Karen轉投商界，開學校教小朋友跳舞，直至○三年沙士才結業，接着又搞過花店和髮型屋等。「我自細好貪靚，對珠寶好有興趣，不如試吓做珠寶啦。」○五年她修讀GIA珠寶鑑證課程，○六年以自己名字「Karen Collection」推出鑽飾，並在中環租樓上舖做寫字樓和陳列室。「我真係好好彩，可以將自己鍾意嘅嘢變成事業。」

珠寶首次參展即升呢

Karen對這盤生意十分認真，由揀石、設計到銷售都一腳踢。「我對藝術嘅眼光係累積返嚟，設計鑽飾唔使日畫夜畫，心中自然有構圖，再交畀師傅去造。」訪問當日，她戴上自己設計的七卡黃鑽戒指和三卡鑽石耳環，富貴逼人，她卻大發嬌嗔：「我唔戴唔得呀，好多客要我做埋model，如果有客買，我即刻除出嚟㗎！」

原本Karen只做熟客生意，但其後得到知名珠寶設計師陳世英鼓勵，遂決定「出嚟見人」，參加公開展覽。最難忘是前年三月，她首次參加會展的世界珠寶展，負責人看見她的作品後驚嘆不已，立即讓她「升呢」到grand hall擺攤位。「喺珠寶我搵到滿足感，愈來愈多人欣賞我嘅設計，真係好開心！」她雀躍說。

孫譽文小檔案

原名：

孫名翠

學歷/專業資格：

‧香港演藝學院現代舞高級文憑

‧香港演藝學院藝術學士

‧GIA珠寶鑑證文憑

現職：

Karen Collection設計師兼老闆

選美獎項：

1990年亞洲小姐第五名