政情：搞搞政：黃灝玄履新只聽不講

商務及經濟發展局局長Rita劉吳惠蘭尋日同傳媒見面，席間除咗有副局長蘇錦樑同一眾轄下常秘外，仲多咗個新人，就係尋日首日返工、負責工商及旅遊科嘅常任秘書長黃灝玄。

黃灝玄以「新丁」身份列席，全場都冇發言，事關大政策有Rita講，就算同佢有關嘅旅遊事務，亦由旅遊事務專員容偉雄招架解答，唔需要佢開金口，所以佢就保持一貫笑容聆聽，間中仲眼仔碌碌望吓天花，暫時做住「旁聽生」，學習學習兼收吓風喇！

據了解，佢上任前已經多次到商務及經濟發展局「備課」，對處理範疇已經有一定嘅認識，加上佢喺政務官嘅生涯中，曾經先後派駐日內瓦同布魯塞爾經濟貿易辦事處，依家重操工商事務，應該算係「半熟手技工」。

黃灝玄上一份工係公務員事務局常秘，喺立法會調查梁展文事件研訊中，被批評處理梁展文加入新世界中國的申請時失職，而佢喺聆訊中承認「做得不夠細緻」，「看得不夠透徹」。唔知係咪吸取教訓，所以佢想睇清楚個新環境先，於是尋日就「保持沉默」呢？