政情：關愛基金又關愛建仔
政治圈冇永遠嘅朋友，亦冇永遠嘅敵人，睇吓關愛基金督導委員會尋日公布嗰份增補委員名單就係個「辦」喇！之前同政府申亞反枱嘅建仔有兩個區議員成功「分餅仔」，同樣反申亞嘅泛民就得個恨字。
關愛基金早前針對唔同範疇成立咗四個小組委員會，喺增補委員名單中，建仔嘅離島區議員周轉香同荃灣區議員陳恒鑌，分別被委入民政同醫療小組。咪住！陳恒鑌似乎同醫療冇乜關係喎，莫非佢有啲鮮為人知嘅醫療知識？另外，被梁栢賢力壓、無緣坐正醫管局行政總裁一職嘅張偉麟醫生，亦加入咗醫療小組。
須知道關愛基金牽連資源甚廣，唔少委員將來都會向基金申請撥款，難保唔會出現利益輸送嘅問題。據悉，委員會已引入雙重申報制度，確保公平公正喎。