政情：肥平送暖籲港生捐利是
由民政事務局前局長何志平等人組成嘅「寸心行動」，尋日發起捐利是行動，呼籲全港中小學生，新年後捐出一封或以上利是，送暖到內地。
教育局副局長陳維安舊年鼓勵大仔去桂林陽朔做義工，了解民間疾苦。肥平發起嘅「寸心行動」，佢都好支持，鼓勵學生將部分利是儲起之餘，捐助內地貧苦大眾，仲教佢囝囝咁樣善用利是。講起封利是，佢唔使太太操心，由佢一手包辦，仲自爆封利是冇上限。
「寸心行動」主要為中國受沙漠化或荒漠化影響嘅貧瘠地區籌款，用作綠化環境及扶貧。不過，肥平話全世界最沙漠化嘅地區，係香港人嘅愛國心。佢話中國幅員廣闊，香港學生捐出嘅利是錢，只係杯水車薪，意義大於實際，事關香港回歸十三年，好多人依然未有愛國意識，所以希望透過今次活動，灌溉香港年輕一代沙漠化咗嘅愛國心。
「寸心行動」基金係中國綠化基金會對口單位，難怪何志平（右起）、中聯辦官員李薊貽、陳維安、黎耀祥、梁愛詩同劉迺強齊撐場。