政情：邊太呼冤無心超齡參選

香港女童軍總會新總監之爭月初塵埃落定，現任總監邊陳之娟鐵定四月卸任。一切風雨暫告平息，邊太講嘢亦比以前放得多，一直冇公開回應過「超齡違規參選」風波嘅佢日前打破沉默，對我哋堅稱自己真係一直冇為意參選總監原來有年齡上限規定，佢仲話就連世界女童軍總會對領導層都係冇呢個規定，所以佢同負責搞選舉嘅人都冇為意過，直至件事曝光，大家先如夢初醒咁話，佢又一再強調，「超齡參選」只係無心之失。

事件曝光後，各大傳媒都不時收到爆邊太種種疑似違規行為嘅黑材料，邊太話真係唔知邊個咁大仇口，亦唔想估係邊個爆料，唯一可以講嘅，係事件發生後的確有少少唔開心，件事令佢認清楚邊個係真朋友。

訪問尾段，邊太以「性傲皆因經歷少，氣平還受琢磨多」十四字真言同所有朋友共勉，用嚟總結幾十年做義工經驗。不過，計我哋話，佢用呢副對聯總結自己喺今次風波嘅遭遇，似乎更加貼題喎，唔知邊太點睇呢？