政情：副局鬥龜縮 阿忠發炮勢株連

喺○八年尾的士堵塞北大嶼山公路一役，街工嘅立法會議員梁耀忠踢爆運輸及房屋局副局長邱誠武唔肯接聽的士司機大佬嘅電話，拒絕對話，最終導致事件失控爆發承擔責任。事隔兩年，阿忠又對班副局發炮。

政府每年使幾千萬元僱用副局長同政治助理，但呢班政治新丁嘅表現劣評如潮。阿忠透露，佢同班議員同僚不時約晤副局長商議政策，但近期屢遭拒絕，佢已經至少食咗兩次檸檬，感覺好冇癮，批評政府用咁多錢請副局，聲稱係要培育政治人才，但係副局唔肯同議員接觸，簡直倒錢落海。

邊兩個副局咁可惡？佢語帶雙關咁話名字就唔公開嘞，事關可能其他副局對立法會議員都一樣咁「冷漠」，如果只講佢遇到嗰兩個，對呢兩位副局太唔公平咁話。阿忠嘅潛台詞，即係指副局對議員邀約商議政事大派食檸檬，佢嘅遭遇只係冰山一角，硬食檸檬嘅議員極可能唔止佢一人，狂請議員食閉門羹嘅「冷漠」副局何止二人。

口頭質詢要林公公解畫

阿忠有氣難消，聽日喺立法會大會提口頭質詢，要求當局交代去年每位副局曾接觸邊啲議員約晤討論相關政策、討論事項為何、副局最終派出幾多個檸檬畀議員硬啃，同埋派檸檬嘅理由為何？佢仲要政府交代有冇制訂指引，促使副局有效履行定期與議員聯繫職責。擺明唔妥班副局，聽日大家不妨睇吓負責解答嘅政制及內地事務局局長林瑞麟「林公公」點解畫？

老實講，正如先前推銷競爭法嘅商務及經濟發展局副局長蘇錦樑，畀班議員鬧鑊甘後，竟然匿埋做宅男搞網上軟銷，睇嚟班副局龜縮係有迹可尋。今次阿忠踢爆佢哋，分分鐘一石激起千重浪，議員群起投訴，牽連隨時大過國籍風波。