就業壓力被低估 港府靠害新移民

港人內地超齡子女今年四月一日起可以申請單程證來港，據估計，符合申請資格人士數以萬計，佢哋最快年底前就會陸續來港同家人一齊生活。

家庭團聚係基本人權，放寬港人內地子女來港無可厚非，港府點樣透過配套措施令新移民盡快融入本港社會，至係問題關鍵。

超齡子女最細都廿幾歲，抵港之後第一個挑戰就係搵番份工。係人都知，香港人浮於事，工揀人，唔係人揀工。就算土生土長，搵份好工都唔係咁易，更何況初到貴境嘅新移民。奇怪嘅係，港府高官呢方面勁樂觀，完全唔覺得有乜問題。

呢，勞工及福利局局長張建宗尋日大派「定心丸」，話超齡子女來港唔會對社福制度同勞工市場帶嚟壓力，當局正考慮為新移民增加兩萬個僱員再培訓局課程名額協助佢哋就業。

叮！如果信晒佢，實撞板都得嘞。家陣內地經濟蓬勃，大把機會，有份好工仲使乜落嚟搵食吖。來港超齡子女多數只能夠搵入職要求比較低嘅工種，但呢類低技術工種香港最多人爭，你話嘞，新措施點可能對勞工市場冇影響吖？

嗱，工聯會副會長陳婉嫻就鬧得啱嘞，佢批評張建宗嘅言論不負責任同低估咗問題，「政府唔可以等天到等運到」，乜都唔做。基層市民就業情況本身已經唔理想，現時勞工市場應付本地需要都牙煙。超齡子女搵工其實並唔容易，如果問題持續，最終都要去申請綜援。

更令人擔心嘅係，超齡子女搵唔到工要去攞綜援，會引起市民同新移民之間嘅矛盾，造成社會分化，正如嫻姐話齋：「政府唔好以為有綜援就好架勢。」所以話，當局低估問題嘅嚴重性，直頭係靠害。

話時話，張建宗唔係傻仔，冇理由唔知問題嚴重性嘅。低估係假，想卸責就真。嗱，佢話為新移民增加再培訓名額，但係有關注團體踢爆，家陣僱員再培訓局主要提供清潔及保安等嘅學額，並冇針對新移民提供特別課程。以往接受培訓後搵到工嘅新來港人士，連三分之一都冇。好明顯，當局根本就喺度敷衍市民。叮！

港府增加就業得個講字，本港失業率長期居高不下，今年五月一日開始就要實施最低工資，到時可能有好多人冇咗份工，再加上數以萬計超齡子女落嚟，勞工市場情況絕對不容樂觀。

超齡子女相當一部分係低技術、低學歷人士，人地生疏，融入本港社會已經困難重重，港府閂定後門，拒絕提供足夠嘅配套支持，要佢哋自生自滅，唔止不負責任，簡直係冷血。叮！