政情：大輝八五折買愛爾蘭馬
身兼廠商會立法會代表同地區組織C18召集人嘅林大輝，啱啱以約三百萬港元買咗隻愛爾蘭馬，今個月二十六號就會抵港。大輝好開心咁話原本同賣方傾好價錢，點知臨尾賣方賣大包，畀咗個大折扣佢，比原價平咗一成半，即係八五折。點解？原來當地經濟未復甦，益咗佢執平貨，雖然未改名，但佢話大多叫做乜乜「奇妙」o架喇！
尋日氣溫得九度，大輝同C18成員喺上水北區公園大派愛心曲奇、玩具同紙巾，街坊有得玩又有得食。無論係曲奇、紙巾定係大輝披住嘅頸巾，全部都印有C18嘜頭，認真hard-sell。
啲心形愛心曲奇係C18成員百分百手工製作，難怪每一塊曲奇嘅造型都咁獨特啦，佢哋亦唔介意街坊一啖食咗C18落肚。
大輝（右）話條頸巾由佢親自設計。左為民政事務局副局長許曉暉。