政情：搞搞政：德成局長逆民意肥平冇眼睇

申亞撥款甩轆，政府反斥「畀人跣低」，將結果歸咎於建制派。久未露面嘅民政事務局前局長「肥平」何志平尋日出席一個宗教活動時，本來一直守口如瓶，但當記者提起近日因申亞而引起嘅風波，佢話申亞呢家嘢，「唔係某人話想做就做、政府話想做就做、某個團體話想做就做」，最重要係要得到地區民眾支持，否則都係嘥氣。

佢咁講，好難唔令人聯想起佢嘅繼任人、民政局局長曾德成，事關立法會財委會上禮拜五審議申亞撥款時，班議員怒斥德成局長漠視民意。

肥平唔肯講政府今次申亞嘅做法係咪「霸王硬上弓」，但坦言對政府此舉感到「好奇怪」，亦唔明點解市民願意支持東亞運同奧運馬術，偏偏唔肯對申亞賣帳，促請政府內部檢討吓今次有乜甩漏、做錯咗啲乜喎！

咁政府未來若想再度申亞，應該有乜嘢準備呢？佢即時好大反應咁驚叫：「唔係嘛，再申亞？」佢認為下次一定要市民「lur」政府申亞，政府先好去搞：「搞體育搞文化永遠都係民間主導㗎啦，市民唔要，政府做嚟做乜？」