政情：選民力量年宵惡搞卿姐

旨在狙擊白鴿黨嘅「選民力量」可謂無孔不入，連年宵擺檔都唔放過機會。選民力量核心成員「星屑醫生」歐陽英傑尋日話，佢哋今年將會處女下海，喺維園年宵擺檔賺經費，頭號產品係一支名為「民主女神棍」嘅吹氣棒，重點係支「神棍」上印有卿姐芳容，箇中意義不言而喻；另一創意產品就係「卿姑七友」吹氣坐墊，供不滿白鴿黨嘅人士作出氣之用。

星屑醫生係「維園阿哥」任亮憲嘅老友記，任亮憲被指涉嫌非禮及強姦案後，呢個幾禮拜都冇去維園「當值」，老友是非多多，星屑醫生竟然仲諗點樣賺錢？

面對社民連狙擊，兼再有二十名黨員退黨，四面受敵嘅卿姐亦自顧不暇，尋日帶領該黨新東支部約二十名黨員召開「晒馬大會」，強調該支部雖然喺過去個幾月流失七名區議員，但對支部影響唔大，更聲言立法會一人兩票係個黨爭番嚟，有信心該黨可喺嚟緊嘅區選收復失去嘅議席喎。