政情：Vivienne Tam演繹自家春裝
著名時裝設計師Vivienne Tam譚燕玉尋日罕有咁亮相馬場，佢穿上一件黑皮褸，密密實實，原來內有乾坤，皮褸下係Vivienne最新設計嘅紫色春裝，令人有暖意盎然嘅感覺。
專心喺紐約發展嘅Vivienne再現香江，風采依然，佢身上演繹嘅當然對來季潮流有所啟示。佢今季大玩中國剪紙元素，身上呢條裙，遠睇似片片紫色花瓣，睇真啲，原來係由動物剪紙圖案組成，既飄逸又活潑，而佢嘅新作剛喺紐約展出。
難得返港，佢話會睇埋貿易發展局舉辦嘅時裝騷先走。美國早前刮起大風雪，相比之下，Vivienne覺得香港好溫暖。記者又留意到向來獨來獨往嘅佢，尋日身邊多咗位中年外籍男伴。係咪男友？佢笑而不答。
Vivienne Tam演繹用剪紙圖案拼製成嘅飄逸連身裙。