政情：鬍鬚曾迷戀陰險傅滿州

財爺鬍鬚曾周不時鍾意緬懷舊日，尋日就喺個人網誌憶述六十年代喺美國嘅青澀歲月，提到當時中國人喺美國主流媒體形象低落，男嘅總係留住「師爺鬚」嘅傅滿州（Fu Manchu）猥瑣形象，女嘅總係鳳眼妖冶嘅蘇絲黃，文中佢仲搵咗一張舊照同大家分享，估唔到佢今時今日二撇雞嘅造型始自當年，而當年嘅造型係照抄傅滿州。

傅滿州係英國推理小說作家筆下嘅虛構人物，性格陰險冷血，被視為史上最邪惡嘅角色，而嘴上兩條「師爺鬚」，更加係招牌特徵。掌管政府財政「算死草」嘅鬍鬚曾又係留二撇雞，同佢交過手嘅政界人士，以及望穿秋水都等唔到政府動用財政儲備紓緩通脹之苦嘅升斗市民，係咪覺得傅滿州唔止係小說先至存在呢？鬍鬚曾尋日自揭二撇雞嘅由來，原來佢幾十年嚟活喺傅滿州呢個咁負面嘅陰影裏面。人有好多面，真係唔講唔知，知就嚇你一跳。