政情：卓永興日日洗腦吳秋北保持清醒

工聯會理事長吳秋北（吳揪得）當選勞工顧問委員會勞工界委員冇耐，近日忙到飛起，皆因佢忙於參加勞工處方面搞嘅簡介會，日日周身唔得閒。簡介會啫，使唔使講到咁誇張呀？如果咁諗就錯喇，佢透露呢啲簡介會係密集式舉行，上禮拜就去咗三日，其中一日仲由朝早九點開到傍晚六點。

吳揪得話雖然唔係日日開會都十幾粒鐘，但要分析勞工處嗰啲所謂論據，真係想花少啲心機都唔得。佢仲笑住咁話，勞工處日日幫佢洗腦，除咗介紹勞顧會嘅工作之外，仲不斷灌輸勞工處已經做咗好多工作嘅訊息畀佢。

政府呢啲招數可謂司空見慣，勢估唔到畀勞工界炮轟同工會溝通好有問題嘅卓永興上場做勞工處處長冇耐，竟然咁快上手搞埋呢啲洗腦工程。之不過，若果卓永興以為吳揪得咁易氹嘅話就似乎太天真嘞！雖則吳揪得係勞顧會新丁，但挾住「票王」稱號當選，背後仲有工聯會會長棠哥、副會長嫻姐等前輩支持，佢又點會咁易畀人洗到腦吖！

催逼政府制訂標準工時

吳揪得講到明，工聯會今年會着力催逼政府制訂標準工時，雖然預計今年內都肯定唔可以推出，但佢唔會放軟手腳，唔會畀政府咁易過關。咁即係話，卓永興洗腦唔成，隨時畀吳揪得揪番佢轉頭呀！

嚟緊農曆年假期，吳揪得都冇得停，事關工聯會二月中會組團去廣東省嘅工會拜年，呢個活動已成為工聯會每年大事之一，佢身為理事長當然要同行啦。

吳楸得本來修讀緊文學博士學位，因為早前啱啱上任理事長，公務繁忙搞到寫論文嘅進度慢咗少少，但依家篇論文已經搞掂，等埋論文答辯過埋關就一天都光晒嘞！