申亞鬧劇收場 港府自取其辱

天作孽，猶可恕；自作孽，不可活。港府漠視民意，擇惡固執，申辦亞運夾硬闖關，尋日卒之被立法會財委會否決撥款申請，簡直係咎由自取，與人無尤。

正所謂，得民心者得天下，失民心者失天下，港府申亞碰壁，完全係意料中事。大家都知道，主流民意由始至終反對申亞，認為呢啲係勞民傷財、好大喜功嘅面子工程，唔值得支持，而立法會各主要政黨亦企硬反對，連建制派今次亦唔敢撐港府。申亞不得民心，唔失敗至奇。

正如有議員話齋，申亞撥款被否決，罪不在立法會，港府應該好好反省。係咯，當局為求達到目的，不擇手段，出盡茅招，又呃又氹，依家真係要好好反省吓喇。其他唔講，就講開支預算吖，當局一時一樣，開頭預計一百幾十億，一陣又話六十億，最後又變成九十幾億，都唔知邊句係真邊句係假。唔怪得有人質疑，當局無非想先氹議員入局，等到米已成炊，再慢慢追加撥款。而更加離譜嘅係，當局連民調都做手腳，報喜不報憂，真係豈有此理！

好彩，市民眼睛係雪亮嘅，無論港府點樣弄虛作假，始終呃唔到人。所以咯喎，一鼓作氣變咗一敗塗地，垂死掙扎變咗撼頭埋牆，呢啲咪叫做自取其辱，唔衰攞嚟衰囉。叮！

最好笑嘅係，當局口口聲聲話申辦亞運係為咗發展體育運動，改善體育設施云云，其實全部係呃鬼食豆腐。香港十年前第一次申亞，當時港府亦開出好多期票，承諾改善體育設施、增加對運動員嘅支援等等，講到似層層咁，到頭來咪又係無影無蹤。

話時話，香港唔係冇好嘅運動員，亦唔係冇好嘅成績，問題係港府縮骨，唔肯增撥資源，搞到好多有潛質嘅運動員無心戀戰，半途而廢。計太一叮話齋，只要港府喺預備用作申辦亞運嘅款項中撥一部分出嚟成立體育基金，就可以幫到好多運動員，促進體育發展，提高運動水平，咁豈不是仲實際過舉辦亞運？如果港府連小小承擔都唔肯，咁就不如早抖，永遠唔好再提申亞呢件事。

講開又講，香港人其實唔係唔支持亞運會，更加唔係好似班高官所講對申亞「有成見」，而係唔抵得港府不分輕重緩急，應做嘅唔做，唔應做嘅就亂嚟。嗱，煲呔曾自己都識講喇，應對通脹係港府當前急務。既然係咁，應該集中精力先搞好經濟及民生，點解仲要本末倒置，搞埋啲唔等使嘅面子工程呢？

呢，啱啱出爐嘅兩岸四地消費信心調查顯示，香港市民嘅消費信心指數已經跌到兩年新低，好多人擔心通脹進一步惡化。睇到未吖，通脹猛虎殺到嚟喇，唔該你班高官做好呢份工，快快趣趣諗吓點樣應對，唔好再發埋啲不切實際嘅白日夢喇，叮！