政情：蘇菲拍住老公推廣足球
立法會尋日否決咗二○二三年申亞嘅開支撥款，好多體育界人士都感到沮喪，不過，經濟動力就打鐵趁熱，今年會舉行一個「香港足球發展研討會」，為足總嗰份「鳳凰計劃」顧問報告做推手，主講嘉賓包括足總主席梁孔德同身為經濟動力立法會議員嘅太太「蘇菲」梁劉柔芬，呢次唔知叫夫唱婦隨，定係婦唱夫隨呢？
呢個研討會由經濟動力主辦，主題通篇都係足球，仲請咗好多本地足球界人士參加。蘇菲即使喺富貴黨嘅年代，已經多次喺立法會幫足總或足球運動提質詢，依家更加以黨嘅名義搞研討會，睇嚟足球成為經濟動力嘅主打政綱之一。