政情：葉劉追殺司局亂拼湊

新民黨搵嚟一班前高官做顧問，無論係前廉政專員羅范椒芬，定係前資訊科技及廣播局局長鄺其志等，個個都曾經喺官場歷練二、三十載，講到對特區政府嘅認識，分分鐘深過家吓嗰啲問責官員，加埋新民黨主席兼保安局前局長葉劉淑儀，難怪佢哋嘅頭炮就係拆政府骨啦。

違反政治倫理

葉劉話，個顧問團已經火速投入運作，頭炮係研究現時政府架構嘅不合理現象，即係炮轟三司十二局胡亂拼湊，違反政治倫理。羅范、鄺其志同新民黨執委郵政署前署長譚榮邦，已經以小組形式開過至少兩次會議，預計喺農曆新年之後，會有正式嘅報告提交畀執委討論，呢個報告一出籠，睇怕政府都會好肉酸。

事關葉劉明言，點解土地唔由運輸及房屋局管，而係林鄭月娥管轄嘅發展局呢？甚至劉吳惠蘭主管嘅商務及經濟發展局統攬範疇太龐雜，人口政策冇人觀察。

林鄭同唐唐一直係葉劉炮口下嘅高危官員，呢次睇怕都走唔甩。