政情：搞搞政：Miriam捱夜趕工寫揮春
新春將至，政黨嘅例行工作大增，富貴黨主席劉健儀（Miriam）就話，佢近排晚晚開夜車寫揮春，起碼要寫三百份先夠數，佢惟有捱夜寫揮春。點解唔叫榮譽主席田北俊同未來副主席「莎姐」周梁淑怡幫吓手呢？Miriam笑笑口話，呢啲咁刻苦嘅工作，通常都係由佢做。
不過，Miriam都話，相信田少同莎姐遲啲會落區寫幾張嘅。晚晚咁捱法，又瞓唔夠五粒鐘，搞到Miriam好躁，尋日立法會內務委員會就快舉行，各議員趁機會交流、傾吓偈，平時夠鐘都會隻眼開隻眼閉嘅主席Miriam就罕有咁黑面叫議員唔好再傾偈，語氣都幾躁底吓。
問起原因時，Miriam先解釋黑面唔係因為心情差，而係最近太多嘢做，個腦有十萬樣嘢轉緊。佢仲話，自己唔係想發同事脾氣，只係想快啲完成內會啫。