政情：博愛三日盆菜宴饗長者
博愛醫院近年積極推動發展中醫藥服務，仲計劃下個月二十五號至二十七號，喺觀塘康寧道遊樂場舉行一連三日嘅中醫義診，免費贈醫施藥之餘，仲會請老人家食盆菜。一眾博愛醫院高層同協辦機構尋日聚首傾細節，身兼九十年中藥老店第三代傳人嘅香港中藥協會創會會長兼理事長李應生同博愛主席黃帆風等都有出席。
據講，今次「中醫中藥保健安康香港行」活動，博愛旗下十八部流動醫療車將全部出動義診，仲會連續三日設三十八圍盆菜招呼老人家當午飯同晚飯，不過義診同食盆菜都要事先攞飛。有興趣嘅老人家，可以向博愛醫院或者觀塘區議員陳振彬、周耀明、潘兆文同馮錦照辦事處查詢索取事宜，到時會有象徵式收費。
黃帆風（右）同李應生（左）傾落區做善事，愈講愈開心。