政情：白鴿仔倒戈幫高官解窘

政改方案通過後，白鴿黨同政府愈行愈埋，白鴿仔獲委任做重量級公職嘅機會亦多咗。尋日立法會兩個會議公審政府，都有白鴿黨嘅核心人物坐喺官員席，「倒戈」幫政府攔截議員質問，佢哋就係西九管理局薪酬委員會主席「單雞」單仲偕，同關愛基金轄下嘅執行委員會主席羅致光，佢哋兩個不約而同掉轉槍頭，雖然冇同議員針鋒相對，但佢哋各自發功，都攔咗好多刁鑽問題，呢啲咪叫「往日嘅敵人係今日嘅盟友」囉！

讚政府係好僱主

立法會監察西九推行情況小組委員會尋日討論謝卓飛辭任西九文化區行政總裁嘅事，身為西九管理局主席嘅政務司司長唐唐領軍上陣，單雞以薪酬委員會主席身份傍住佢。議員問到點解管理局請人前唔驗身，同埋點解計算一月份糧時，謝卓飛獲成個月嘅半糧等，唐唐都搵單雞代答，或者係以前做過議員啦，單雞答問題時語調平和，不時用殘疾歧視條例等質住議員嘅嘴，仲不時讚政府係良好僱主，好似封定勞工界議員嘅後門咁。

無獨有偶，羅致光尋日都傍住民政事務局局長曾德成出席民政事務委員會會議，佢負責基金執行嘅細節，泛民議員對係咪設立基金同基金運作，都有好多異議，睇嚟羅致光以後大把機會同啲往日戰友交手。

公聽會勢陷苦戰

白鴿黨核心人物坐入議事廳官員席，難怪泛民激進聲音質疑白鴿黨已被政府收編，政圈更有一啲反白鴿黨勢力好唔鍾意咁嘅安排，千方百計咁狙擊白鴿黨。負責政改本地立法嘅委員會今日會舉行會議，並邀請咗近百個團體舉行公聽會，有參加團體好唔客氣咁打出「紅燒老鴿同鄉會」標語，擺明同白鴿黨過唔去，睇嚟佢哋今日又會陷入苦戰！