政情：搞搞政：黑英撐母校追殺孫公

北區十四間中學前日聯署承諾明年自願中一減班，而教育局局長孫明揚出席聯署儀式後，搵埋班校長做布景板，竟然仲話唔擔保唔殺校㗎，唔知做布景板嗰班校長有乜感想？

相信大家仲記得，天文台前台長「黑英」林超英不滿教育局涉強行要佢母校，即係喺中西區嘅母校英皇書院縮班而大動肝火，鬧爆教育局出陰招，又發公開信要求孫公解畫。

前日黑英外遊歸來，喺網誌話經過中西區區議會大比數確認反對英皇書院減班，要求英皇減班事件已告一段落，仲警告當局咪使旨意使橫手再要求校管會傾呢個問題。

黑英咁講算係宣布喺英皇書院減班事件鳴金收兵，但見到孫公企喺北區校長布景板講嗰番話都有啲氣，仲好寸話：「知道北區的中學減班超額完成任務，各區有自己的區情，我們理解。既然這邊超額，那麼就不必勉強了吧。」潛台詞係叫孫公好收手！

咁都不特止，佢仲附帶寫道，唔知道幾時教育局會要求直資中學減班？事關佢仲未收到教育局嘅具體回覆。咁擺到明黑英喺縮班事宜上仲未收手，繼續咬住孫公唔放喇！