政情：蘇錦樑扮宅男硬銷競爭法

因為硬銷競爭法，商務及經濟發展局副局長蘇錦樑喺議事堂被議員圍攻至遍體鱗傷，近日有網民發現，佢潛匿網上世界養傷，兼向網民埋手，喺個人facebook專頁搞「競爭法知多少？」

佢喺前日下晝四點幾喺fb留言搞呢個網上遊戲，以選擇題形式，每日將一條問題放上網，仲留言話邊個喺十題中答對七題，就可以做大師，無非想刺激網民嘅好勝心態。其後十幾個鐘頭，有約二十個網民回應，其中好多都好聰明，冇中佢嘅軟銷圈套，留言唔係答問題，反而係表態指對競爭法有保留。

放上網嘅第一條問題，叫大家喺五個選項中，揀出邊項唔係競爭法嘅好處，只有四個網民回應，全部答中，佢可能見反應麻麻，喺尋日上午十一點，自己開古答番自己嘅問題，簡直同宅男一族平日愛以虛擬身份喺交友網站自問自答一模一樣。

呢個網上答問遊戲，問題欠缺新意，又冇獎品，得個講字，睇怕最後又係畀人圍插，隨時爛尾收場。