政情：饒戈平妙談井水論
有「護法」之稱嘅北京大學法學院教授兼基本法委員會委員饒戈平，尋日出席浸會大學嘅名人講座，畀記者問咗多條敏感問題，佢聽後面無懼色，仲侃侃而談自己嘅見解，反而主辦單位代表兼前港區全國人大薛鳳旋就一度嘗試為對方擋開問題，場面都幾搞笑。
港澳辦主任王光亞早排發表「井水不犯河水論」，饒戈平尋日話以一國兩制嘅理念去睇，呢個比喻未必咁確切，因為井水同河水其實都係國家嘅水。記者再追問佢認為應唔應該畀民運人士王丹入境弔唁司徒華，佢就話呢個係香港本地事務，佢樂於見到進展。
饒護法又提到政改一役，雖然白鴿黨繞過政府直接同中央談判，但中央同民間本來就應該有溝通，唔認為咁做會影響中央同特首嘅關係。至於可唔可以一次過立法解決普選問題呢？佢話提議有創意，但要先等社會有共識先可以評論行唔行得通喎。
