政情：司局長鬥交波 肥根扯火

推莊卸責呢啲官場歪風，咪以為只係會用嚟蝦啲投訴無門嘅小市民，原來對住尊貴嘅立法會議員亦都「一視同仁」，立法會漁農界議員「肥根」黃容根尋日就喺立法會答問大會上爆大鑊。

漁農業係夕陽行業，但唔代表可以畀人蝦到上面，肥根喺會上當面向煲呔曾發炮，指新界西北近年大興土木，港珠澳大橋、赤鱲角機場第三條跑道、研究中嘅屯門隧道，加埋海岸公園工程，全部集中喺新西沿海進行，令漁民損失慘重，但係多年嚟業界向政府追討無門，質問煲呔曾點樣補鑊。

話說煲呔曾見肥根愈講愈㷫，於是想敷衍幾句打發佢，叫肥根搵相關局長商討，點知一講即捉蟲，話音未落，肥根再發威，話之前搵過相關部門，踢爆佢哋個個交波，話唔關自己事，呢啲部門包括鄭汝樺嘅運輸及房屋局、邱騰華嘅環境局、被嘲為「每周一鑊」周一嶽嘅食物及衞生局，仲有林鄭月娥嘅發展局，肥根竟畀四個部門當波踢，真係火都嚟埋！

鬍鬚曾早禱會冚實醜事

見下屬當眾出醜，煲呔曾想話打圓場，講笑話：「我哋除咗局長，仲有司長。」即時望向政務司司長唐唐同財政司司長鬍鬚曾嗰邊，意思叫肥根搵佢哋幫手，仲話佢哋一定會喺政府高層「早禱會」上跟進，當時唐唐可能以為煲呔曾指嘅係自己，仲笑到見牙唔見眼。

哈！煲呔曾開口中，肥根即刻搶白，話已經連司長都搵過，司長一樣唔理佢，引得哄堂爆笑。事後問肥根，佢口中嘅司長其實係鬍鬚曾，咁即係話，鬍鬚曾連同四個局長，齊齊喺早禱會隱瞞肥根嘅求助個案，真係認真抵打。鬍鬚曾同四位局長累老闆當眾出醜，答問大會之後，唔知又會唔會畀煲呔曾當面訓斥呢？