莞深通街毒臘肉 食物安全危危乎

農曆新年就快到，置辦年貨要趁早。民以食為天，過年餸菜豐儉由人，冇錢食鮑參翅肚，可以蒸番底蘿蔔糕。炒餸蒸糕當然唔少得靚臘味啦，依家正係銷售旺季，市面臘味品種繁多，但如果一味貪平，分分鐘食完團年飯就要入醫院送舊迎新，同醫生講恭喜發財。

內地黑心食品層出不窮，執法部門近排喺東莞、深圳多個批發市場檢獲聽見都作嘔嘅毒臘肉。惠州有地下工場將收番嚟嘅病死豬用可致癌物亞硝酸鹽浸泡過之後，醃製成售價遠低於市面嘅「美味臘肉」。據講，流入兩地批發市場嘅毒臘肉，每日至少有一噸，問你驚未！

更可怕嘅係，呢啲食咗隨時出事嘅黑心臘肉，居然仲包裝成正貨賣。無良商家先申請做名牌經銷商，然後自己印埋包裝紙同質檢標籤，仲要做戲做全套，做埋真空包裝混水摸魚，真貨假貨一齊賣。業內人士爆料，部分病死豬早喺夏天已經瓜咗，等挨年近晚臘味銷售旺季，至加工成毒臘肉出售，真係愈諗愈反胃。

價錢平一大橛、真空包裝，連質檢標籤都有齊，唔怪得毒臘肉喺東莞等地賣通街咯。話時話，港人買嘢一向信牌子，毒臘肉包裝以假亂真，防不勝防，萬一黑心產品流入香港，市民隨時中招。

內地假劣食品五花八門，除咗三聚氰胺毒奶粉、孔雀石綠魚、蘇丹紅雞蛋，仲有將貓肉、鴨肉用羊尿浸出羶味當羊肉賣，用病雞死雞做鹽焗雞，用色素將豬肉染紅當牛肉賣，總之樣樣嚇死你。

叮！假劣食品之所以屢禁不止，完全係地方官員打擊不力，甚至同流合污所致。呢，毒臘肉比正貨平咗六成，照行家講法，咁嘅價錢連鮮肉都買唔到，入面肯定有景轟，但當局根本唔當一回事。

又好似舊年同樣喺東莞爆出嘅「毒河粉」醜聞咁，無良商家用含黃曲霉素等有毒物質嘅發霉米，經漂白加工製成河粉出售，質檢部門發現，當地河粉合格率只有百分之七。絕大部分產品質量都「肥佬」，有關部門乜都唔做，你話情況有乜辦法唔失控吖。

結果話口未完，深圳今年初又發現「毒腐竹」，不法商人被踢爆為降低成本，用劣質黃豆加入化學物質漂白生產腐竹，雖然色澤光鮮，但係分分鐘食壞人。

內地假劣食品無王管，本港食物安全防線岌岌可危，港府如果唔加強防範，隨時全城淪陷。弊在衞生當局既唔識喺問題食品源頭加強堵截，入口檢驗又例牌慢幾拍，好似呢次德國雞蛋事件咁，後知後覺，結果又搞到一鑊泡。計太一叮話齋，靠呢班衞生高官，防得呢樣，難防嗰味，梗有一樣害死你。叮！