SUN世代：咖啡王子做生意講口齒

黃浩鈞是香港餐飲聯業協會會長黃家和的兒子，家族經營咖啡茶葉生意。這位「咖啡王子」酷愛歎咖啡，喜歡事事親自參與。四年前到上海打天下，將港式飲食文化帶入內地。做生意，他認為「有口齒」最重要：「講得出就要做得到，做唔到寧願唔講！」

三十二歲的黃浩鈞（Howard）樣子有點像藝人方力申，他說連父親都覺得二人相似。他在加拿大成長，○一年大學畢業返港，加入父親創辦的金百加集團，現職餐飲服務部總經理。「其實我每個部門都做過，市場部、會計、送貨、炒咖啡、沖奶茶都好熟手㗎！阿爸教落，最重要自己落手落腳做，好多嘢唔做過唔會識。」

第一次見客變交友

公司以「大排檔」品牌推出咖啡、奶茶和茶葉等傳統港式飲料，除在超市零售，又供應予食肆。旗下的有機健康產品「點點綠」，營業額亦不斷增長。四年前，父親派他到上海「打天下」，發生不少難忘事，「記得第一次見客，我普通話好差，傾咗成日，個客都唔知我講乜！最後做唔成生意，但就同個客做咗朋友。」

「喺內地做生意，同香港好唔同，香港有晒system（系統）去做，但內地好多時要講關係，不過關係打得好，最多都係帶你入門口，要真正傾成生意，都係要靠實力。」他認為內地商機無限，其公司的生意額每年都有兩位數字的百分比增長，「特別係二、三線城市，例如杭州、重慶、成都，市場空間好大，內地人好接受香港品牌，覺得好trendy（時尚），係信心保證。」

Howard爺爺在上世紀三十年代已經營捷榮辦館（即捷榮咖啡前身），五十年代更在上環開設海安冰室，父親是「香港咖啡紅茶協會」會長，近年的奶茶王大賽成本地飲食界盛事，Howard可說在咖啡奶茶香中成長。

日日飲成咖啡達人

他日日飲咖啡，對咖啡亦甚有研究，「最鍾意巴西咖啡，味道豐富、夠厚身！其實每個地方嘅咖啡豆，香濃度都有唔同，加埋唔同煮法，味道千變萬化！而香港茶餐廳通常會將四、五種產地嘅咖啡豆mix（混合）嚟用。」他滔滔不絕地說。

接掌家族生意至今，差不多有十年時間，說到做生意最重要是甚麼，這位「咖啡王子」不假思索：「口齒最重要！阿爸亦不斷同我講，講得出就要做得到，做唔到寧願唔講！」至於未來目標，他說：「公司只係創辦咗十幾年，希望可以幫到公司更成熟發展，喺市場上佔有領導地位。」

Howard's Profile

年齡：32歲

學歷：加拿大麥可馬斯達大學商學院榮譽學士

現職：金百加集團餐飲服務部總經理

公職/社會事務（部分）：

‧北京海外聯誼會青年委員會委員

‧中華廠商聯合會青年委員會副主席

‧湖南省青年聯合會港區特邀委員

‧香港咖啡紅茶協會副主席