政情：陳碧鏵傳日內加盟TVB

舊年八達通出售客戶個人資料搞到滿城風雨，一姐陳碧鏵孭鑊請辭，八達通啱啱委任咗前VISA國際組織香港及澳門區總經理張耀堂做新CEO。事隔大半年，究竟前一姐去咗邊呢？

據聞陳碧鏵已搵到筍工，極有可能加盟電視廣播有限公司（TVB）做海外發行，即係TVBI，職位最少係總經理，仲可能喺呢一兩日內上任。陳碧鏵由文儀用品推銷工作晉升至電訊公司總經理，又去過VISA任高職再轉投八達通，期間大多數都係由獵頭公司挖角，所以得到TVB話事人「六嬸」方逸華賞識，一啲都唔奇。

消息話，六嬸大半年前已斟陳碧鏵過檔，喺電視城更見過陳碧鏵芳蹤添，傾就傾咗好耐，只係一直只聞樓梯響。消息又話，TVBI總經理個位已懸空咗五、六年，家陣由集團總經理李寶安兼任，所以要開番呢個位，都唔係冇可能。TVB外事部副總監曾醒明接受查詢時，話直至尋日都未收到任何消息。