政情：蒙德揚元旦派對險泡湯
踏入二○一一年，信興集團副主席David蒙德揚首先就要多謝老友港大校長徐立之幫咗佢一個大忙，借出校長府邸花園，如果唔係，信興搞咗幾十年嘅元旦Garden Party，今年分分鐘要泡湯。
David話佢哋呢個元旦Party已搞咗幾十年，每年都會喺佢已故爸爸蒙民偉舂坎角嘅別墅搞，所以可以話係爸爸同成間公司嘅一個傳統，就算上年爸爸身體唔好，冇出嚟一齊玩，Party都一樣繼續。蒙叔過咗身，David都好希望可以延續爸爸好客之道，但估唔到中間出現阻滯，喺Party前十日，David先收到通知，話有人反對別墅開派對，嗰段時間係聖誕同新年旺季，可以容納到幾百人嘅場地絕無僅有，咁點算好呢？咪就係好彩有朋友幫手囉！
蒙德揚（左一）好多謝徐立之（右一）嘅幫忙，中為蒙德揚嘅兩位同事。 （蒙德揚提供）