政情：德成局長獨裁搞喎申亞

政府唔理民意提出申辦亞運，聽日就會去立法會財務委員會申請撥款，但撥款勢將否決，究竟致命傷係乜呢？原來係民政事務局局長曾德成搞衰咗個開頭。

唔聽公關廣告泰斗意見

德成局長喺舊年九月宣布政府申辦亞運，事前就成立咗個二○二三年亞洲運動會臨時申辦委員會，網羅社會各界人士廣集專業意見。聽聞會上有位公關廣告界殿堂級人物，喺德成局長宣布申辦亞運之前，模擬咗啲大方又得體嘅回應畀佢參考，主題係圍繞「申辦亞運係為未來投資」、「申辦亞運係為社會將來發展」等等，偏偏德成局長唔聽講，宣布要用四百四十六億元申辦亞運，其中一百四十五億係直接成本開支，仲懶勁咁講咗句：「政府決唔搞冇長遠效益嘅華麗工程，東亞運冇出現大白象，主辦亞運亦唔會生出大白象！」

就係呢句「大白象」搞到成單嘢喎咗，據聞嗰位殿堂級人物見德成局長唔聽意見，自把自為搞咗隻「大白象」出嚟，已經冇眼睇。後尾政府見坊間對搞亞運劣評如潮，政黨又唔支持，個個淨係記得「大白象」，惟有急急再搵番呢位高手再諗對策，但係覆水難收，德成局長之後雖然改口用番建議嘅回應，亦難以力挽狂瀾。