政情：「雙波」同場 立會秩序大亂

咪以為人有相似先有煩惱，名有相似都一樣，好似立法會「雙波」保險界議員陳健波同會計界陳茂波就鬧出笑話。

話說立法會尋日討論政府嘅安老政策，主席叫陳茂波提出佢嘅問題時，坐喺佢身邊嘅另一「波」陳健波突然話應該輪到佢發言至啱。主席以為自己眼花讀錯，即時道歉，點知陳茂波又話自己都有按掣排隊發言，認為主席冇搞錯，係陳健波以為自己被叫錯至真。主席都畀佢搞到亂晒龍，陳健波即時顯得有啲尷尬，陳茂波仲笑言：「我哋兩個波攪亂晒你哋，真係唔好意思喇！」

「雙波」同屬五散人，喺立法會唔算高調，故不時畀人撈亂。陳茂波就曾經呻過，有市民走去徵詢佢保單嘅意見，陳健波亦話有唔少人打去問佢攞有關會計嘅資料，講咗一輪先知對方搞錯。睇怕都係因為「雙波」畀人認錯得太多，所以形成心理陰影，陳健波今次至會對錯號入錯座。