政情：新民黨頭炮倡建行人海隧
政府有關紓緩海底隧道擠塞嘅顧問報告建議「紅加東減」，畀三間巴士公司鬧爆之餘更威脅加價，而由保安局前局長葉劉淑儀牽頭組成嘅新民黨，喺立法會嘅頭炮就係要求起多條過海隧道。
葉劉將喺本月二十六號禮拜三立法會大會中提出書面質詢，指最近有市民向佢提出創意方案，不如興建行人專用過海隧道，內設購物廊，由中環行路過尖沙咀，步程二十分鐘，亦可設行人輸送帶，既可環保減排，又能開拓公共空間，仲可以創造就業添，問政府有冇諗過同可行性幾大？即係借市民把口，逼政府考慮。
呢個構思有幾多市民賞識同成本效益有幾大？暫時好難講，聖經故事有摩西帶以色列人過紅海出埃及，依家葉劉帶港人行路過維港，唔知最終係咪可以變成另一神話呢？
葉劉話起行人海隧既環保又能開拓公共空間。 （資料圖片）