政情：鬥唱做咗建制派 大舊鐵頭仁互插

喺白鴿黨轉軚支持政改方案一役後，泛民主派互相攻訐，社民連更怒轟白鴿黨已走進建制派，仲話過會透過任何機會狙擊白鴿黨。沉寂一輪後，社民連終決定夥拍其他團體組成新聯盟，打正旗號喺嚟緊嘅區議會選舉狙擊一眾白鴿仔。

聯合部隊狙擊白鴿仔

社民連兩名「大佬」黃毓民同「大舊」陳偉業正密鑼緊鼓組織一支「聯合部隊」，喺未來區議會選舉向白鴿黨報仇。聯盟發言人大舊預告，聯盟將喺過年後正式啟動，期望可派出二百人出選區選，而佢就會親自狙擊白鴿黨主席鐵頭仁。

大舊尋日又再大翻舊帳，埋怨「公投」期間鐵頭仁冇幫佢哋助選，即使到投票當日，亦只肯喺宣傳車上叫人投票，並冇叫人投畀公社兩黨，故絕對唔會對佢手下留情喎。

面對大舊點名狙擊，鐵頭仁就氣定神閒咁話「由得佢」，聲言佢咁做不但未必搶到佢啲票，反而可以谷高投票率喎。佢又話如果大舊係真心想贏佢嘅，佢會尊重，亦無任歡迎，但若果佢只想攬住白鴿黨一齊死，咁佢嘅做法同做建制派B隊冇分別，等於曲線幫建仔同工聯會助選，仲打趣話：「既然佢早就視我哋係建制派，咁我哋同建仔兩個建制派互砌，你嚟做『架樑』做乜啫？」

鐵頭仁又批評大舊咁做係喺度行使「政治霸權」，咁遲早連公文袋都係建制派，得番佢哋係民主派囉。不過，大舊就一於少理，聲言佢哋成立聯盟同「公投」一樣係「新民主運動」，旨在畀選民多個選擇，即使最後輸晒都唔緊要，仲話倘若唔咁做，香港就會冇民主喎。

社民連本身都內訌分裂開兩個核心，依家鐵頭仁同大舊更互轟係建制派，睇怕泛民陣營有排亂。