食署滅蚊毀生態 珍稀植物遭滅門

有個古仔好多香港人都聽過：從前一個老太太有隻祖傳宜興紫砂壺，裏面積滿茶垢，唔使放茶葉，一沖熱水就有茶嘅香味。有人出高價收買，老太太好開心，將茶壺洗乾淨交畀買家，點知買家耍手擰頭話唔買喇，事關洗咗茶垢，隻紫砂壺根本唔值錢。

呢個古仔係一個前中央領導人講嘅，佢用紫砂壺比喻香港，用茶垢比喻香港嘅傳統特色，要香港人好好珍惜。老人家語重心長，可惜港府高官借咗聾耳陳隻耳，十幾年嚟唔知倒咗幾多茶垢，其他唔講，淨係獨具特色嘅生態環境已被佢哋玩到殘。

港島南區嘅深水灣谷擁有河谷地貌，河岸兩邊有茂密嘅攀藤及樹木，其中有種稀有植物「海邊馬兜鈴」，花朵龐大，外形特別，極具觀賞價值。每年仲有大批斑蝶喺度過冬，深水灣谷可以話係一個天然寶藏。政府○八年就將呢度定為「具特殊科學價值地點」，吸引大批遊客嚟參觀或研究。

勢估唔到，深水灣谷家陣面目全非。有人將河床裏面嘅石頭搬走，將河道收窄拉直成「坑渠」，最冇陰功嘅係，將沿岸嘅攀藤及樹木斬清光，連海邊馬兜鈴亦慘遭滅門，斑蝶等多種昆蟲都無影無蹤。

邊個咁大整蠱呀？咪就係食環署囉。佢哋話河床嘅石頭同河道兩邊嘅植物令水流唔夠急，岸上嘅樹木又令陽光照唔到河水，啲水變咗死水，就會有傳播瘧疾嘅按蚊孳生，所以要將樹木斬光，將攀藤剷光，將水底嘅石頭搬走，然後將河道收窄改直。

咁佢哋知唔知剷咗嗰啲係稀有植物呀？知唔知咁搞法會趕走晒啲斑蝶㗎？其實就算知道，亦唔會理。事關食環署將滅蚊工作外判畀承辦商後就關人個關。承辦商嘅任務係消除按蚊，話之你剷咗嗰啲係唔係珍稀植物啦。咁咪叫做工作外判，責任亦外判囉，可憐好好一個深水灣谷，生態嚴重被毀。

佢哋咁搞法，令太一叮諗起一個古仔，從前有個江湖醫生自稱包醫駝背。有個駝背佬嚟求醫，醫生就用兩塊門板夾住佢，然後喺兩面用力壓，卒之個背直番，不過人亦瓜老襯嘞。後來個醫生被告上衙門，佢仲實牙實齒話，我包醫駝背之嘛，又冇話包佢唔死！今時今日，食環署班人亦可以話，我包滅蚊之嘛，又冇話包唔破壞生態環境。

最搞笑嘅係，件事被踢爆後，食環署、漁護署等部門先至齊齊去深水灣谷做騷，話會向職員提供指引，既確保滅蚊嘅工作順利進行，又盡力保護生態喎。

事後諸葛亮有鬼用呀，嗰啲珍稀植物可以死而復生，飛走嘅斑蝶仲會飛返嚟咩？叮佢個鎯鎯！