Sun世代：金融女強人設計精彩人生

命運開了李慧芬一個小小的玩笑—她讀時裝設計出身，當過時裝設計師，對金融業並不喜歡。但兜兜轉轉，她最終投身金融界，更成為業內精英，令她深感造化神奇，「接觸咗先知，金融業其實有好多學問！」

李慧芬（Stella）是實德期貨及外匯有限公司總裁，主理外匯業務，她也是香港中華廠商聯合會常務會董，是名副其實的女強人。Stella生於富裕家庭，祖父李琳明是本港第一家五金製品廠創辦人，不論是政府部門的金屬設施、馬會徽章、抑或電視台頒發的白金唱片獎座等，都由祖父一手包辦。

鍾意扮靚讀時裝設計

她有一姊一弟，是家中老二。「我自細就好鍾意扮靚，係細佬鼓勵我讀時裝設計嘅。」她小時候已被父母培養彈琴跳舞，故父母對她的選擇並無反對，她亦順利獲理工太古設計學院（現為理工大學）時裝設計系取錄。

畢業一年後，她便達成心願—擁有自己的時裝店。她在尖沙咀星光行的樓上舖開店，售賣自己設計的服飾，九○年更獲得全港公開時裝設計比賽亞軍。「開自己嘅店，係讀fashion嘅人嘅理想，當時由設計、搵廠生產、銷售都係我一個做晒，真係好辛苦o架，不過做得好開心！」她回憶說：「試過年尾畀廠甩期，但舖頭入面啲衫又賣晒，唔可以開住舖但冇衫賣畀人嘛，惟有喺出面買衫回來，再自己動手改，放在舖頭賣。」

涉足金融改負面觀感

後來業主大幅加租，時裝店被迫於九二年結業，此時母親和外婆都叫她買股票當儲錢。「由細到大，好憎股票金融，覺得啲人好市儈，諗住自己點都唔會做呢行，點知家人叫我投資，我唔想乜嘢concept都冇就拎錢出嚟，就試吓入行啦，睇吓呢行究竟係點。」

Stella最初加入英皇證券，涉足金融世界後，才發現內裏大有學問。她由最初的玩票性質，漸漸變得認真起來，更修讀財務管理學位，直至○五年過檔實德任總裁至今。「原來金融唔係淨係講錢咁市儈，反而係同全球嘅經濟、政治、民生有關，例如貨幣，最初係由以物易物開始，發展成國與國之間嘅利率問題，唔係一味攞嚟炒！」她滔滔不絕地說。

在金融界發展順利，且身居要職，她深感命運自有巧妙安排。然而放棄當時裝設計師，可惜嗎？「如果我有一日死了，冇機會再接觸fashion，真係會覺得遺憾，但做人有得有失，放棄咗係可惜，冇辦法啦。」做過時裝業，亦教會她買衫之道：「我唔會買貴衫！幾千蚊嘅都會買，但過萬蚊一定唔買，做過呢行就知，成本其實好低，賣咁貴都只係畀晒廣告費，唔值呀！」

Stella's Profile

現職：實德期貨及外匯有限公司總裁

學歷：香港理工太古設計學院時裝設計系

　　　英國Queen's University of Brighton財務管理學士

公職（部分）：

香港中華廠商聯合會常務會董

香港中華廠商會青年委員會名譽主席

僱員再培訓局金融及保險服務顧問

藝術發展諮詢委員會委員

香港教育學院校董會成員

恩平工商會李琳明中學/廠商會中學/九龍城浸信會禧年（恩平）小學校董