政情：社民連內訌註冊鬧雙胞

社民連內訌已係不爭事實，繼早前倒閣、新花都同會址基金連串醜聞後，最新係連社民連嘅公司註冊都鬧雙胞。

網上最近流傳一份公司註冊處文件，講述社民連喺舊年十月分別註冊咗兩間名為「社會民主連線有限公司」同「新社會民主連線有限公司」嘅公司。文件流出後，屬於「黃派」嘅兩名副主席即時發表聲明，話對事件絕不知情，網友亦質疑陶君行有心搶走社民連個朵。

阿陶尋日解畫話社民連一直循政黨化發展，將佢註冊為公司係必經階段，行委亦討論過，質疑有人心中有鬼，仲公開要求前黨主席黃毓民停止無理取鬧搞分裂。

佢自言無意落台，亦唔會另起爐灶，但毓民近日自行夥拍黨友「大舊」陳偉業，同選民力量、前綫等組織成立咗一支「聯合部隊」，計劃喺選舉狙擊白鴿黨。據悉，毓民拉咗唔少社民連黨員加入，毓民同大舊仲會出任發言人。大舊話社民連早已講好唔參與協調機制，所以佢哋做緊嘅嘢冇違黨紀。