政情：搞搞政：阿王為阿牛請命
尋日舉行嘅立法會食物安全及環境衞生事務委員會會議，原本係討論漁農自然護理署增設一名首長級薪級第一點嘅首席獸醫師嘅職位，點知工聯會嘅新界西議員「阿王」王國興突然提問大嶼山流浪牛嘅問題。
阿王話收到大嶼山巴士公司司機反映，指流浪牛成日阻住條窄窄嘅行車路，搞到巴士左閃右避。佢質問話：「政府係咪要搞到牛死、車翻、人傷，先至識做嘢？」跟住佢又話當局應該關注吓流浪牛嘅福利，仲話政府仲唔做嘢，唔通要搞到車毀牛亡、人死車翻先突然醒悟？
講到咁激，在場嘅議員同官員個個都Ｏ晒嘴，事關呢個位係負責檢驗同檢疫部門，協助助理署長工作，專門監督禽鳥同豬隻情況，防止又爆禽流感同豬流感，點都同流浪牛福利扯唔上關係啩！阿王咁落力，唔通想攞流浪牛票？
