政情：洪小蓮獲頒理大院士感動到喊

李嘉誠基金會董事Katherine洪小蓮尋日獲理工大學頒發大學院士，佢以理大校友身份攞獎格外興奮，老公梁光建同囝囝梁承傑專登嚟恭賀。

見慣大場面嘅Katherine見到成班老友嚟打氣，一開腔致辭就感動到喊，幾乎講一句喊一次，台下嘉賓為之動容。佢多次深呼吸忍淚，終於完成演辭，引嚟全場掌聲。佢散場時話冇諗過自己咁水皮，但一諗到成功女人唔易做，既要努力，又要有能力，仲要識得排解壓力，淚珠就好似決堤咁湧出。

尋日仲有七位傑出人士齊獲獎，包括著名設計師Freeman劉小康。Freeman喺設計界獲獎無數，致辭時不忘多謝恩師靳棣強。話說佢當年無意中喺街上見到靳叔畫嘅美術課程招生海報，從此立志做設計師，理大畢業後考入靳叔嘅設計公司，一做就三十年，佢做埋恩師公司嘅合夥人，可謂亦師亦友。