政情：羽球雙姝玩謝唐唐

立法會財委會後日表決申辦二○二三年亞運撥款，以依家政治形勢底下，幾乎肯定會「判死刑」，但政府仲喺度垂死掙扎，多名問責高官繼續輪流拍片，扮運動健將死撐申亞。

前日財爺鬍鬚曾同喇沙學弟玩劍擊，尋日就輪到政務司司長唐唐同特首辦主任譚志源粉墨登場，同香港羽毛球前一姐陳念慈同新一姐葉姵延合演混雙羽毛球賽，唐唐身穿嘅Ｔ恤有個2字，陳、葉分別係0同2，而譚志源就係3字，一睇就知喺度硬銷申亞啦！

陳念慈暗寸推動體育不力

短片經過精心剪輯，大部分時間都影住四人隔住個網猜波，睇唔到兩名高官跣腳、拗柴，或頻頻出界同打空氣嘅場面，但賽後嘅訪問片段，兩人平日缺乏運動、臨時拉伕扮健將嘅醜態就原形畢露。

唐唐不斷喘氣同滴晒汗咁話自己偶爾都有同家人打羽毛球，但早前同囡囡對打時，就因為囡囡「唔識就住老人家」，搞到佢整傷咗隻左腳，成條韌帶差啲斷晒。譚志源就仲失禮，自言以前讀書時成日打羽毛球，即係畢業後就好少打啦！難為段片嘅旁述仲大讚兩人「好快就回復狀態」、「表現有板有眼」。

兩名高官廢噏後，輪到陳念慈發言，內容可圈可點。佢話今次同高官作賽都好開心，因可以「等佢跑吓」，明寸兩人球技差；又話今次申亞不論成功與否，對體育界同整個香港嚟講其實已經贏咗，因為可以引起社會討論香港嘅體育發展，好過以前完全冇人講，暗寸政府過往推動體育不力。

今次唐英年同譚志源出醜，變咗反面教材，咁下次又輪到邊個呢？會唔會係「好打得」嘅林鄭月娥打跆拳道，定係出名死唔斷氣嘅林瑞麟跑馬拉松呢？如果耍太極係亞運比賽項目嘅話，肯定金銀銅牌都由高官擸晒。

尋晚政界又傳嚟消息，話之前猶豫未決嘅富貴黨，最終決定加入反對申亞行列，意味政府已對後日嘅表決結果扯白旗投降。奉勸其他高官唔好再頂硬上忽然體育喇，否則整傷咗要請假睇醫生，最後咪又係要納稅人埋單找數！