電話推銷唔堵塞 消費陷阱難消失

內地曾經有套賀歲片將手機比喻做「手雷」，無論辰時卯時、東南西北都畀人搵到，有乜行差踏錯，隨時爆炸。家陣仲弊，就算行得正企得正，冇欠大耳窿，偷食識抹嘴，電話一樣可以令人煩到抽筋。

呢嗱，愈來愈多人有以下嘅痛苦經歷：做緊嘢、食緊飯、同老細開緊會，突然收到三唔識七嘅人來電，推銷呢樣，游說嗰樣，仲要雞啄唔斷嗰隻，滋擾程度直頭攞命過追魂Call。

咦，乜電訊管理局○七年底唔係實施咗《非應邀電子訊息條例》，禁止商業機構濫用電話錄音推銷嘅咩？滋擾電話變本加厲，唔通條例提早收皮？原來條例好似跛嘅咁，監管範圍只限錄音推銷，人對人嘅銷售管唔到。

唔少商業機構吼準呢個法律漏洞，透過「人肉電話」做推銷，令市民飽受滋擾。有幾煩？嗱，有市民曾經一個鐘頭內十三次收到一間酒店推銷餐飲會籍嘅電話，就算講到明冇興趣，對方照樣不停咁打嚟。

咁都未算煩，有商業機構走法律罅再加高科技，用電腦隨機打出電話，接通之後淨係響一、兩下就收線，特登留低來電顯示，等對方喺唔知情之下回覆，到時用電話錄音或者人對人嘅方式推銷。

有監察騷擾電話網站負責人話，近幾個月涉及電話錄音推銷嘅舉報升咗六至七成，形容電訊管理局「有法不執等如無牙老虎」，政策相當失敗。亦有資訊科技界立法會議員批評當局失職，令市民受到騷擾，建議設立具法律效力嘅「拒絕接收人對人推銷名單」保障市民。

叮！家陣香港巧立名目嘅消費陷阱多到無倫，消委會○八年至舊年十月收到有關推銷海外度假會籍、酒店餐飲會籍同保險產品等嘅投訴多達二千幾宗，當中涉及電話推銷嘅個案絕對唔會係細數。如果港府繼續唔嗲唔吊，只會有愈來愈多無辜市民中招，跌落陷阱不可自拔，到時破財事小，搞出人命事大。

講真，政府面對不良經營手法束手無策，又何止「人肉電話」推銷吖。呢，舊年頭八個月，消委會同電管局共接獲近萬宗涉及電訊公司單方面更改合約、迫使消費者付出更高費用才提供服務嘅投訴。個案急升原來係因為局方之前向業界發出嘅通訊服務合約實務守則，只屬自動參與性質，對遏止不良營商手法一啲作用都冇。

監管漏洞唔堵塞，消費陷阱難消失。如果電訊管理局仲唔諗計杜絕人肉電話推銷擾民，太一叮一定會對住班高官叮完又叮，等佢哋嘗吓奪命追魂叮嘅滋味！