工聯會副會長陳婉嫻當年仲做緊立法會議員時，不時同時任公務員事務局局長嘅林煥光駁火，家陣大家都已退落嚟，昔日火花不再。
嫻姐尋日出席婦女動力基金嘅活動時，唔單止見到好多婦女界嘅好拍檔，更巧遇平等機會委員會主席林煥光呢位「舊政敵」。嫻姐致辭時仲笑言，喺林煥光冇做官後，先同佢做到老友，事關佢比以前講多咗好多真心說話，又大力批評政府假諮詢，聽得佢好鬼開心。
聽到嫻姐咁講，原本坐定定嘅林煥光都打咗個突。佢事後笑言，佢同嫻姐不嬲都咁friend，同佢做官與否冇關喎！
退下火線嘅嫻姐同林煥光，依家變咗老友。
