政情：搞搞政：富貴黨唔賀葉劉組黨

保安局前局長葉劉淑儀牽頭組成嘅新民黨尋日舉行領導層就職儀式，唔少政界人士到賀，但有新民黨副主席田北辰「鬧翻」出走嘅富貴黨，同埋一向同田二少唔啱嘴形嘅經濟動力，頭面人物一個都冇現身。

咁又難怪，外界估計，新民黨走中產專業路線，對富貴黨票源影響最大，唔通要富貴黨高層如主席劉健儀嚟祝新民黨大展鴻圖咩！中聯辦亦冇人到賀，葉劉講笑咁話，中聯辦冇刻意祝賀佢，「可能佢哋仲要觀察吓啦。」

打開新民黨份顧問團名單，退役高官滿目皆是，好似前衞生福利司黃錢其濂、前資訊科技及廣播局局長鄺其志同前廉政專員羅范椒芬咁，郵政署前署長譚榮邦更入黨做執委，變相組織民間「AO（政務官）黨」。

AO族群畀面文化盛行，前同僚組黨大慶，局長空群到賀，最矚目係上年為舊樓「強拍」同葉劉隔空駁火、勢成水火嘅發展局局長林鄭月娥現身。記者尋日重提舊怨，林鄭話：「議會嘅嘢，係好平常嘅事。」