政情：阿松二仔獲男拔小取錄

有「百年學府」之稱嘅香港大學，尋日喺沙灣徑何鴻燊體育中心舉行百周年啟動禮及巡遊，好多政界人士、前任高官校友都嚟撐場，其中七三年畢業校友、前財爺梁錦松，就帶埋「國寶級」老婆伏明霞同三個仔女參加，仔女跟埋一堆小朋友巡遊，媽媽小伏就追住喺旁邊影相。

阿松、小伏之前為二仔皓嘉報讀直資名校拔萃男書院附屬小學，阿松透露已收到取錄信，今年九月升小一。佢話，其實有為囝囝報埋聖保羅男女中學附屬小學，結果未知，但已一心畀囝囝讀男拔小，皆因大女已讀緊聖保羅男女，佢唔想囝囝讀同一間，怕佢「活在家姐的陰影下」。囝囝將來會唔會入埋港大呢？阿松話到時先算喎！

除咗阿松外，富貴黨副主席「莎姐」周梁淑怡同老公周明權都帶孫仔孫女出席。莎姐話以前住何東宿舍，大學時代嘅佢比較文靜，較少參加體育活動，反而走咗去夾大學band，醉心唱歌。