政情：金勞詹敢整容唔敢增髮
立法會金融服務界議員「金勞詹」詹培忠抵受唔住友人慫恿，接受細胞技術美容，想塊面回復青春。
試咗美容新科技，但金勞詹噏唔出係乜嘢名堂，淨係知塊面畀針拮咗十幾針，用咗三萬蚊。報道出街後，醫生打電話畀佢，解釋指呢種係德國最新技術，喺人體內抽出血液，以儀器將血液內嘅壞細胞篩走，而剩低嘅好細胞就攞去培植，再注射入人體，可以抗衰老，令肌膚回復青春。金勞詹話乜原理都好啦，最緊要有效。
佢敢做白老鼠試嶄新美容科技，有冇諗過以類似科技刺激頭皮，令頭髮回復濃密呢？佢話幾十歲人，冇所謂啦，仲話：「我對呢啲嘢從來冇信心。」即係唔敢試新「髮」，費事希望愈大，失望愈大。
