政情：張建宗失職議員爭住插

立法會財委會喺嚟緊嘅禮拜五審議政府嘅申亞撥款，孭飛嘅民政事務局局長曾德成肯定變炮灰，而喺財委會前兩日召開嘅立法會大會，佢嘅同僚勞工及福利局局長張建宗亦被圍攻。

但凡禮拜三例會都有六條口頭質詢同十四條書面質詢，而喺呢二十條質詢當中，關張建宗事嘅就佔四分之一，包括咗三條口頭質詢同兩條書面質詢，係眾局長之冠。

眾所周知，勞工界嗌到口水乾叫政府設立退休保障制度，等啲打工仔將來老咗都有啲依靠，但政府一直扮聾耳陳，臨近新預算案喺下月發表，當然又係時候向政府發炮。

刮隱蔽長者成效存疑

職工盟嘅李卓人率先翻政府舊帳，話政府早前講過中央政策組現正研究現行退休保障模式嘅可持續性，中策組早喺○四年七月已成立專家小組研究有關課題，仲分別喺○七同○八年接獲初步研究結果，質詢張建宗究竟初步結果嘅詳情係點？呢個課題研究咗六年，當局預計幾時先完成？阿人擺明係鬧政府拖得就拖，要張建宗交時間表。

政府曾經大鑼大鼓話要主動出擊搵啲隱蔽長者出嚟，但成效令人存疑。社民連嘅議員就舉出舊年兩宗駭人聽聞嘅倫常悲劇，質詢張建宗究竟搵咗幾多社工做呢件事？又有冇針對隱蔽長者嘅問題，檢討現行安老政策？

再培訓課程千瘡百孔

除咗長者問題外，培訓工作都千瘡百孔。工程界議員何鍾泰問機電工程專業人員同技術人員應報讀邊啲由建造業議會訓練學院開辦嘅適任技術人員TI課程；保險界議員陳健波就質詢政府有冇評估由僱員再培訓局搞嘅保險業課程嘅成效；富貴黨主席劉健儀則問有關涉嫌騙取「交通意外傷亡援助金」嘅情況。

呢幾瓣既係棘手亦係遲遲未解決嘅社會問題，睇怕班議員會鬧爆張建宗，就算佢點解畫都甩唔到身㗎喇，都係捱轟啦！