壯志未酬先劈炮 西九殘局怎麼搞

上任只有五個月嘅西九管理局行政總裁謝卓飛突然以健康理由辭職，令人大跌眼鏡。本來呢，有人辭官歸故里，有人漏夜趕科場，人事更替係好正常嘅事，唔值得大驚小怪，問題係呢位洋總裁實在太過短癮，張櫈仲未坐暖就話劈炮唔撈，很難唔引起諸多猜測。除咗健康理由之外，真係冇其他原因？你話呢？

當初港府大鑼大鼓展開全球招聘，喺眾多應徵者中精挑細選，最後先至揀中謝卓飛，可以講得上係萬里求才，百裏挑一，相當難得。話時話，曾擔任倫敦巴比肯中心藝術總監嘅謝卓飛的確唔係泛泛之輩，否則又點可能脫穎而出吖，記得佢上任之初雄心勃勃，話要將西九打造成亞洲首屈一指嘅文化藝術中心，仲要將世界最好嘅藝術帶嚟香港添。點知話口未完，佢自己就意興闌珊，無心戀戰。唉，諸葛亮就話出師未捷身先死啫，勢估唔到謝卓飛壯志未酬先劈炮，實在搞笑。

其實，西九高層人員突然辭官歸故里，今次已經唔係第一單，比起上次嗰位上任七日就劈炮嘅行政總監，謝卓飛捱足五個月先至走人，都算唔話得咯。上次行政總監係以私人理由劈炮，今次行政總裁係以健康理由辭職，理由雖然唔同，但異曲同工、殊途同歸。正如有人話齋，因誤會而結合，因了解而分手，不亦宜乎！

講開又講，當局千辛萬苦先至喺外國搵到個人才，點知人才咁快就拒絕再玩，好似細路仔玩泥沙咁，實在太過兒戲。港府一向認為外國嘅月亮比較圓，所以請總裁都要請個外國人，認為咁先至夠卡士。可惜南橘北枳，好多外國人才來到香港後，唔知係水土不服，定係唔習慣香港嘅官僚文化，一個二個由橘變枳，睇得唔食得。例如，昂坪纜車請澳洲公司管理，卒之搞到高空墮車，唔跌死都嚇死；又例如，醫管局請外國人做行政總裁，卒之搞到公立醫院七國咁亂，醫療事故鑊鑊新鮮鑊鑊甘。正所謂，走得快好世界，謝卓飛劈炮走人，無論對佢自己或者對西九都未必唔係一件好事㗎。

順便一提，倫敦巴比肯中心嘅經驗本來就見仁見智，有人讚，亦有人彈，有英國傳媒仲抵死，直情話係一個擁有巨柱嘅醜陋拱門添。港府一味迷信洋人，唔考慮洋人係咪適應香港，有乜法子唔搞到分手收場吖！

無論點都好，勉強冇幸福，洋總裁既然「健康欠佳」，遲走不如早走。當局家陣要做嘅係吸取教訓，物色真正認識香港文化、對香港有歸屬感嘅人才管理西九，否則，請一個走一個，請兩個走一雙，莫講話打造世界級文化藝術中心，連西九管理局可唔可以正常運作都成問題。叮！