政情：徐立之愛情投資唔講金
尋日喺中國經濟人物年度論壇見到港大校長徐立之，佢謙稱對投資冇乜研究，但就話最近有經濟達人朋友提議佢買黃金保值，佢即時回拒話屋企冇地方擺，後來搞清楚先知原來朋友係叫佢投資黃金，只係會畀張紙佢，唔係買一舊舊見到嘅實金，但依然打動唔到校長。咁又係，校長求才不愛財，話說好多年前佢攞咗一個科學研究學術金牌，佢貪得意拎番實驗室磅吓幾重，發現一個咁「重」嘅學術獎原來都只係得三安士半，以當時金價六百加幣一安士計，都真係有限錢，從此校長對錢更加看輕。校長仲講笑話同老婆講心唔講金，最多都係送鑽石。
徐立之（右）笑言對投資冇乜研究。
董（吉吉）（左起）、卡地亞高級珠寶部主管林玉茵同東華主席梁定宇太太張雅麗投資各有所好。