政情：女童軍選總監又傳醜聞
受「超齡總監違規參選」醜聞困擾的香港女童軍總會，將於今日下午三點投票選出新一任香港總監。選舉前夕，各大傳媒又收到自稱係總會職員者告密，矛頭直指某位現任高層，指佢安排飯局，又送禮物予多位有投票權嘅總監，目的係為其中一位候選人拉票，若該候選人當選，有人就可做幕後總監，告密者擔心選舉變質同唔公平。
女童軍總會現任香港總監邊陳之娟喺舊年被揭發超齡競逐總監一職，事件經《太陽報》同《東方日報》連日報道後，佢最後放棄候選資格，總會被迫重新展開提名程序，並接獲兩項有效提名，今日會由國際事務總監李周美枝同副總監彭徐美雲角逐香港總監一職。