政情：考評局一哥會考九條尾
香港中學會考已成為歷史，但現今大部分港人都有經過會考洗禮，考試及評核局主席吳克儉都唔例外。考評局尋日起一連三日舉行資訊日，展出部分會考准考證、會考證書等，主席吳克儉見到都話好有親切感，事關當年佢讀老牌名校金文泰中學，一九七一年應考會考，七二年讀完中六後就直入中文大學。
不過，佢對自己嘅英文會考成績相當唔滿意，耿耿於懷，但咁反而成為學習推動力，課餘、公餘時間再去報讀夜中學英專課程、英國文化協會課程等，英文仲叻過會考嗰時。究竟佢會考成績係點？佢只係肯講自己有「九條尾」，即係九科都係C級或以上，咁睇嚟佢嘅自我要求都幾高噃。
佢仲記得當年唔怕唔記得起身去考試，皆因媽媽仲緊張過佢，每日提點，一定冇失拖咁話。所以話，會考對香港人嚟講，都可以話係一個集體回憶。
吳克儉（右）睇番舊會考規則手冊等展品，勾起唔少兒時回憶。