政情：神童羅范做新民黨顧問
由匯賢智庫葉劉淑儀籌組嘅新民黨，後日舉行領導層就職儀式。早前有傳新民黨吸星遇阻力，最新消息傳來，新民黨變陣延攬有「神童」之稱嘅港交所前行政總裁鄺其志同前廉政專員羅范椒芬等人做顧問，用顧問名義吸人。
新民黨嘅顧問委員會共十七人，唔少都喺政經界頗具睇頭，除曾做過庫務局局長嘅鄺其志同現任全國人大代表嘅羅范外，仲有前行會成員陳智思、廠商會會長黃友嘉、德昌電機主席汪穗中、偉易達集團主席黃子欣、立法會前會計界議員李家祥、海洋公園主席盛智文同拔萃男書院校長張灼祥咁，其中汪穗中同黃子欣，都係新民黨副主席田北辰嘅好友，剛過檔嘅田二少睇嚟都有貢獻。葉劉尋日預告，到後日舉行就職禮，顧問團成員仲有驚喜畀大家喎。