政情：鄉委會選舉隨時大變天

村代表選舉喺啱啱過去嘅周日（二日）起一連四個星期日舉行，點知未到二十三日新界鄉議局主席劉皇發競逐連任龍鼓灘原居民代表嘅重頭戲，周日首天選舉已有出人意表嘅賽果，梅窩鄉事委員會涌口（北）居民代表、身兼離島區議員嘅黃福根同白銀鄉原居民代表黃偉才，雙雙競逐連任失敗，前者更以一票之差落敗。

梅窩鄉委會現亂局外，大嶼山南區鄉委會咸田原居民代表張勁之同居民代表張玉華同樣連任失敗，加上水口兩名村代表放棄連任，令該鄉委會改選倍添變數。早前我哋講過，坪洲鄉委會主席林偉強嘅支持者喺街坊代表選舉中失勢，主席之位危危乎，而屯門鄉委會主席劉皇發亦傳聞會被良田村村代表何君堯挑戰，連任有隱憂。

有鄉紳透露，稍後改選嘅多個鄉事委員會選情將更激烈，七國咁亂，鄉委會分分鐘大變天，隨時重新洗牌，仲話發叔要冧莊做屯門鄉委會主席有難度。