政情：廢法語無倫次 立會圍插唐唐

為咗擴建將軍澳堆填區，政府舊年十月同立法會紮行馬，立法會方面堅持廢除《2010年郊野公園（指定）（綜合）（修訂）令》，但係政府方面就堅持立法會冇權廢法，雙方各自徵詢權威嘅法律意見，搞到氣氛劍拔弩張。

事隔兩個幾月，政務司司長唐唐日前終於解畫話，致函立法會主席話雖然唔認同立法會所持嘅法律觀點，但經考慮後決定唔提出司法覆核，即時辣㷫班議員。立法會內務委員會尋日召開會議，有泛民議員率先發炮，批評唐唐呢封信嘅內容好容易令公眾混淆，一時又話立法會冇權廢法、一時又話唔提司法覆核，認為件事牽涉重大嘅憲政問題。

身有屎唔敢覆核

社民連亦唔執輸，「大舊」陳偉業講到明對政府好不滿，話如果政府覺得立法會違法都唔提覆核，即係有法不依，仲會畀人錯覺立法會凌駕法律添。社民連另一個立法會議員「長毛」梁國雄質疑執政者如果覺得唔公平，點解唔透過法庭還番個公道。

白鴿黨主席鐵頭仁直指政府「出口術」抹黑立法會已經唔係第一次，政府作為行政單位，如果唔提司法覆核即係認為立法會嘅做法合法合憲，絕對唔可以講一套做一套，因為執政者其實有權利，甚至有責任釐清番法律上嘅疑點。立法會法律顧問喺會上亦重申，立法會整個廢法程序合法合憲。

最後內會達成共識，向立法會主席回番封信畀唐唐，解釋番立會立場同法律依據，至於信嘅遣詞用字就留待立會主席聽晒議會嘅意見後，再決定點寫，而呢個訊息就由內會主席劉健儀轉告立法會主席。

唐唐擺明靠嚇「兇」班議員，咁啲議員咪以牙還牙，「兇」番佢轉頭囉！政府成日話要建構和諧社會，其實最唔和諧嘅係政府自己先啱！